An-nuur Na. 163

AN-NUUR
Na.163 Rabiul Thani 1419, Agosti 21 - 27, 1998

Marekani yashambulia Sudan, Afghanistan

Watu wengi wahofiwa kujeruhiwa, kufa

Ndege za kijeshi za Marekani zimeshambulia Sudani na Afghanistan jana (Alhamisi) saa tatu usiku wa kwa majira ya Afrika mashariki.

Kwa mujibu wa matangazo ya CNN, mashambulizi hayo ya yamefanywa kufuatia tuhuma kwamba nchi hizo zinahusika na milipuko ya mabomu kwenye balozi za Marekani katika miji ya Nairobi na Dar es salaam.

Ikulu ya Marekani imesema kuwa mashambulizi hayo yamefanywa ili kutoa kile ilichodai kuwa ni onyo kwa mataifa yanayojihusisha na Ugaidi.

Msemaji wa Ikulu hiyo ameeleza kwamba mashambulizi hayo yaliidhinishwa na Rais Bill Clinton saa chache kabla ya kufanyika na kwamba yalielekezwa katika maeneo yaliyolengwa.

Akitoa sababu za kushambulia Sudan na Afghanistan, Rais Bill Clinton amedai kwamba ana ushahidi wa kutosha kuhusika kwa mataifa hayo na mipango ya kigaidi, kwamba yalishawahi kufanya ugaidi, kwamba yanajiandaa kufanya mashambulizi mengine ya kigaidi katika balozi za Marekani na kwamba yanamiliki silaha za Sumu.

Nchini Sudani ndege hizo za mashambulizi zilikiangushia mabomu kiwanda cha madawa kusini mwa jiji la Khartoum.

Aidha nchini Afghanistan mabomu yaliangushwa katika vituo sita vinavyodaiwa kuwa kambi za "magaidi" hao.

Alipohojiwa mashambulizi hayo yamefanyika kutokea wapi, msemaji wa Ikulu ya Mareakni alijibu kwa mkato kwamba yamefanywa na majeshi ya Marekani.

Kwa upande wake, Waziri wa Mambo ya ndani wa Sudan, ameyaeleza mashambulizi hayo kuwa ni maendelezo ya hujuma zinazofanywa na Marekani dhidi ya nchi yake na kuwa yamefanywa katika kiwanda cha madawa ya binadamu ( Shifer Parmaceutical plant) kinachomilikiwa na watu binafsi kilichopo Kartoum.

Msemaji mmoja wa Afghanistan Bw. Noordullah Zadran alipohojiwa jana usiku na vyombo vya habari alisema kwamba, kwanza hakuna ushahidi wa kumhusisha Bwana Usama bin Laden na milipuko ya hivi karibuni na pili hawatosalimu amri kwa yoyote.

Wakati huo huo, Seneta wa Jimbo la Indiana nchini Marekani bwana Dancoats, ameshutumu mashambulizi yaliyofanywa na nchi yake katika nchi za Sudan na Afghanistan.

Kwa mujibu wa taarifa za CNN, Seneta huyo amesema kwamba licha ya shambulio hilo kutokidhi haja inayokusudiwa, Rais Bill Clinton hana mamlaka ya kuidhinisha jambo zito kama hilo kutokana na kashfa inayomkabili hivi sasa.

Aidha ameshangazwa na uamuzi wa nchi yake wakati uchunguzi wa kuwasaka watuhumiwa bado haujakamilika.

Aidha Seneta huyo ameongeza kusema kwamba mashambulizi hayo huenda yakawaweka Wamarekani katika wakati mgumu wa kuchukiwa na dunia nzima.

Seneta huyo amemtaka Rais Bill Clinton ajiuzulu mara moja kwa hatua yake hiyo ambayo ameieleza kuwa haikuwa na ridhaa ya Wananchi wa nchi hiyo.