An-nuur Na. 162

AN-NUUR Na.162 Rabiul Thani 1419, Agosti 14 - 20, 1998

Athari ya milipuko Dar, Nairobi: Waliokufa wafikia 258

Wengi watuma rambirambi na misaada

Vyombo vya habari vyaitaka serikali iache papara

Na Mwandishi Wetu

Idadi ya watu waliokufa katika milipuko ya mabomu mjini Dar es Salaam na Nairobi imedaiwa kufikia 258 hadi kufikia jana, 248 wakiwa ni waliokufa Nairobi na 10 Dar es Salaam.

Waliokufa katika tukio la Dar es Salaam wametajwa kwamba ni Ramadhani Mahundi, Mtendeje Rajabu, Abbas William na Omar Ahmed Nyumbu. Wengine ni Abdallah Mohamed, Dotto Selemani, Abrahman Abdallah; Hassan Siyad na Yusuf Shamte. Maiti moja ilikuwa haijatambuliwa.

Msiba huu mkubwa umesababishwa na milipuko miwili mikubwa katika Balozi za marekani jijini Dar es Salaam na Nairobi Ijumaa ya Agosti 7; 1998.

Serikali kupitia viongozi wake wa ngazi za juu; imeeleza kushtushwa kwake na tukio hilo na kwamba itafanya kila iwezalo kuwapata watu waliohusika.

Aidha watu binafsi, mashirika yasiyo ya kiserikali na nchi za nje zimekuwa zikitoa salamu za rambirambi; pole na misaada ya matibabu.

Wakati askari wa Israel wamekuwa wakishiriki katika zoezi la kuwaokoa walionasa katika vifusi vya majengo yaliyobomoka

mjini Nairobi. Serikali ya Misri imetuma madaktari na tani mbili za madawa. Saudi Arabia nayo imeripotiwa kutuma ndege ya msaada kwa ajili ya waathirika wakati inasemekana kwamba serikali ya Canada imetoa msaada wa shilingi milioni 45.

Wakati juhudi za Serikali ya Tanzania ikishirikiana na vyombo vya usalama vya Marekani; ikiendelea na juhudi zake za kuwatafuta wahusika imeripotiwa kwamba Waislamu nchini Kenya wanalalamika kuwa wamekuwa wakinyanyaswa toka kutokea kwa mlipuko huo.

Taarifa za vyombo vya habari zimedai kwamba vijana wa Kiislamu na baadhi ya waalimu wa dini wamekuwa wakikamatwa bila maelezo yoyote. Naibu Katibu Mkuu wa Baraza Kuu la Waislamu nchini Kenya (SUPKEM) amewataja watu waliokamatwa na polisi kuwa ni Amjad Javed na Mwalim wa Dini Abdulrazak Qare aliyekamatwa huko Isiolo. Mwalimu Abdulrazak ana asili ya Pakistani.

Aidha Sheikh Ibrahim amekaririwa alisema kwamba vijana wawili raia wa Kenya wenye asili ya Kiarabu walikamatwa mjini Nairobi na haijulikana wanakoshikiliwa.

Nalo Baraza la Ushauri la Waislamu wa Kenya limelaani kitendo cha gazeti la ‘East Africa Standard’ la Jumatano Agosti 12, kuchapisha Katuni ikionyesha Muislamu akiswali kando ya bango lililoandikwa "Kambi ya Ugaidi".

Wakati huo huo, baadhi ya vyombo vya habari vimeitaka serikali kuchukua hadhari katika zoezi la kuwasaka waliohusika na mlipuko wa mabomu katika Ubalozi wa Marekani.

Vyombo hivyo vimeishauri serikali iacha papara inayoashiria kujitokeza katika usakaji wa watuhumiwa.

Ushauri huo umekuja kufuatia kukamatwa kwa watu 14 ambao imedaiwa ni raia wa nchi za Sudan, Iraq, Somalia na Uturuki. Ambapo masaa machache baadaye ikaripotiwa kwamba mmoja wa watuhumiwa hao mwenye asili ya Kisomali ni mfanyakazi wa shirika moja la Umoja wa Mataifa ambaye kituo chake cha kazi ni mkoa wa Kigoma.