An-nuur Na. 162

AN-NUUR Na.162 Rabiul Thani 1419, Agosti 14 - 20, 1998

TAHARIRI S.L.P. 55105, SIMU 181365, DSM Tathmini ya Mchango wa Mashirika ya Dini

Kwa mara nyingine Serikali imetoa pongezi na kuzishukuru taasisi za kidini kwa mchango mkubwa zinazotoa kuboresha huduma za elimu, afya na jamii kwa ujumla. Kama alivyozungumza Afisa Elimu wa Mkoa wa Kilimanjaro kwa niaba ya Mkuu wa Mkoa akifungua kituo cha Markaz El-Hudaa; huduma hizi ni za thamani kubwa kwa Watanzania na hapana budi kuwashukuru wahisani wahusika.

Tungependa tuungane na Serikali katika kutambua na kuthamini misaada katika huduma za jamii zinazotolewa na mashirika ya dini na hivyo kuyapa moyo yazidishe juhudi zake.

Aidha pamoja na kwamba yapo mashirika mengi ya dini yanayofanya shughuli mbalimbali kuwasaidia Waislamu na Watanzania kwa ujumla; tungeyaomba yaige mfano wa Africa Muslim Agency ambayo imelenga katika ile miradi ambayo hasa ndio kilio cha Waislamu.

Suala la kujenga na kuendesha mashule, mahospitali na miradi mingine mikubwa kama hiyo ni suala linalohitaji nguvu kubwa inajumuisha misaada toka sehemu mabalimbali.

Umuhimu wa misaada hiyo ya mashirika ya dini unapata nguvu zaidi ikizingatiwa kwamba uwezo wa Serikali yetu kutoa huduma muhimu kwa jamii unazidi kupungua mwaka hadi mwaka.

Na pengine ni kwakuzingatia ukweli huo Mabaraza ya Kikristo yaliingia mkataba na Serikali ya Tanzania, maarufu kwa ‘Memorandum of Understanding" ambapo misaada ya Kielimu na Afya kwa Tanzania toka kwa Serikali za nchi kama Ujerumani itakuwa ikipitia katika mashirika ya Kikristo.

Aidha Serikali ya Tanzania inawajibika kuyaombea misaada mashirika hayo ya Kikristo toka nchi za nje. Tunaimani kwamba kwa msimamo huu wa Serikali Mashirika ya Kidini toka nchi mbalimbali za Ulaya; Arabuni, Asia n.k. yataitumia fursa hii kuwahudumia waumini wao na wananchi kwa ujumla ili kuimarisha imani zao na kuboresha maisha yao.

Kwa upande mwingine tungependa tutoe wito kwa wananchi kwamba wawe ni wenye kuenzi na kutunza miradi na huduma mbalimbali zinazotolewa na mashirika ya dini ili lengo lililokusudiwa liweze kufikiwa.