An-nuur Na. 165

AN-NUUR Na.165 Jamadul Awwal 1419, Septembe 4 - 10, 1998

Wazazi walia na Mkuu wa shule Mkwawa

Na Mwandishi Wetu, Iringa

WAZAZI ambao hawakutaka majina yao yafahamike wamemuandikia barua Katibu Mkuu Wizara ya Elimu kumlalamikia kuwa wanafunzi watano wa kike wa Kiislamu wa shule ya sekondari ya Mkwawa wanatukanwa, wananyanyaswa na kusumbuliwa kwa sababu ya kuvaa hijabu.

Barua hiyo iliyonakiliwa kwa Rais, Waziri Mkuu, Waziri wa Elimu, Mwenyekiti wa Bodi ya shule ya sekondari ya Mkwawa na Afisa Elimu wa Mkoa wa Iringa imenukuu waraka wa Wizara ya Elimu wenye Kumbukumbu Na.EDC/10/60/VOL.1/4/7 wa Agosti 28, 1995 kwa walimu wakuu wa shule za sekondari na vyuo vya elimu nchini iliyowataka watekeleze mara moja agizo la Rais la kuwaruhusu wanafunzi wasichana wa Kiislamu kuvaa hijabu za rangi zitakazoamuliwa na uongozi wa shule, kama msingi wa lalamiko lao.

Walioandika barua hiyo wamedai Mwalimu Mkuu wa shule ya sekondari ya Mkwawa wamesikika akijigamba kuwa katika kipindi chote atakachokuwa Mkuu wa shule hiyo, wasichana wa dini ya Kiislamu hawataruhusiwa kuvaa hijabu; labda watakuja kuvaa wakati yeye amehama. Hata hivyo wanafunzi wa Kiislamu mpaka jana walikuwa wanavaa vazi hilo.

Waandishi wa barua hiyo iliyopatikana mjini hapa mwishoni mwa mwezi Agosti, wamesema kwa kuwa Wizara inapotoa agizo tegemezi ni agizo kutekelezwa, wanashangaa kwa Mwalimu Mkuu wa Mkwawa akatae kutekeleza agizo la Wizara linatolotokana na agizo la Rais.

Wameelezea mategemeo yao kuwa Katibu Mkuu wa Wizara ya Elimu atachukua hatua zinazostahili kulipatia suala hili ufumbuzi haraka iwezekanavyo.

Imefahamika mwanafunzi pekee aliyekuwa anavaa hijabu mwaka jana alilazimika kuihama shule hiyo kwa sababu hizo hizo.

Serikali iache kudhulumu Waislamu - Bakwata

Na Mwandishi Wetu, Mwanza

SERIKALI imedaiwa kuonyesha dalili za udini na ubaguzi katika utendaji wake jambo ambalo ni kinyume na maadili na katiba ya nchi.

Hayo yamesemwa na viongozi wa Bakwata mkoani Mwanza hivi karibuni.

Akitoa mfano Makamu Mwenyekiti wa Bakwata, Sheikh Idrissa Omar amesema kwamba hivi karibuni serikali iligawa eneo lililokuwa Ranchi ya Mabaki kwa taasisi za dini ambapo ni Kanisa la KKKT na Katoliki pekee waliopewa.

Sheikh Idrissa alisema kwamba hilo lilifanywa kisirisiri kiasi kwamba Waislamu hawakujua kabisa mpango wa kuigawa ardhi hiyo baada ya Ranchi kufungwa.

Akitoa mfano zaidi amedai kwamba serikali imewanyang’anya Waislamu eneo lao la Wakf na kuligawa kwa shule za msingi Mbugani, Nyakabungo na Mirongo.

Sheikh Idrissa Omar amedai kwamba eneo hilo lilitolewa Wakf kwa Waislamu mwaka 1965 na familia ya Virj, lakini baadae wakaambiwa kwamba umiliki wao umefutwa.

Toka wakati huo, amedai Sheikh Idrisa kwamba Waislamu wa Mwanza kupitia ofisi ya Bakwata mkoa wamekuwa wakiilalamikia serikali warudishiwe eneo lao hilo lakini imekuwa vigumu kwa serikali kukielewa kilio chao.Sheikh Idrissa ambaye alikuwa akiwasilisha malalamiko na madai haya ya Waislamu kwa Serikali kupitia kwa Meya wa Mji wa Mwanza, alitaja pia kutaifishwa kwa baadhi ya nyumba za Wakf.

Aidha, alizungumzia jinsi serikali inavyojihusisha na sherehe za Kikristo kama ‘Christmas’ tofauti na inavyofanya wakati wa sherehe za Waislamu.

KESI YA MIRATHI:
Hukumu ya Jaji Agostino yatupwa

Na Mwandishi Wetu

JOPO la Majaji watatu limetengua hukumu ya Jaji Agostino Ramadhani ya Mirathi iliyowahusu Bw. Anwar Z. Mohamed na Said Seleman Masuka.

Katika hukumu yake ya Juni 10, 1997, Jaji Ramadhani alihoji hukumu ya Jaji Msumi ya Septemba 5, 1996 iliyotengua wasia unaodaiwa kuachwa na Rukia Ahmed kwamba mume wake Bw. Anwar Z. Mohamed arithi mali yake yote.

Katika hukumu yake, Jaji Msumi wa Mahakama Kuu wakati huo alitoa hoja kwamba kwa mujibu wa sheria za Kiislamu hakuna wasia kwa urithi na hakuna wasia zaidi ya theluthi ya mali.

Uamuzi huo wa Jaji Msumi ulipingwa vikali na Jaji Korosso akiitaka mahakama ipuuze na waitupilie kwa mbali sheria hiyo ya Kiislamu kwa madai kwamba inavunja haki ya Kikatiba kifungu cha 24 kinachompa mtu haki ya kumiliki mali na kuitumia atakavyo.

Hata hivyo, Jaji Msumi alisisitiza kwamba sheria za Mirathi za Kiislamu ni sehemu katika Qur’an na ni lazima Waislamu warithiane kwa sheria hii.

Na akaonya kwamba kuichezea sheria hiyo ni sawa na kuichezea Qur’an, jambo ambalo alisema Jaji Msumi hadhani kwamba yupo mtu mwenye kuitakia mema nchi hii, anayeweza kulikaribisha.

Jaji Ramadhani kwa upande wake alidai kwamba Jaji Msumi amejichanganya mwenyewe katika hukumu yake kwamba amezingatia "udini" na uzalendo badala ya sheria. Na alisisitiza kanuni ya kutotambua sheria au kanuni zinazokiuka haki za Kikatiba.

Kwa kuzingatia hoja hiyo, Jaji Agostino Ramadhani alimpa muda zaidi mlalamikaji kukata rufaa japokuwa ulikuwa umepita dhidi ya hukumu inayotengua wasia anaodai kuachiwa na mkewe arithi mali yote (watoto wasipate kitu).

Ni hukumu hiyo ya Mheshimiwa Jaji Ramadhani; J.A wa Mahakama ya Rufaa, kutoa muda zaidi ya kukata rufaa baada ya muda wa kisheria kupita, iliyotenguliwa.

Waliotengua hukumu hiyo ni Waheshimiwa Majaji wa Mahakama ya Rufaa; L.M. Makanja, D.Z. Lubuva na B.A. Samatta.

Kwa hukumu hiyo, hukumu ya kuzuiwa kutekelezwa kwa wasia unaodaiwa wa marehemu Rukia Ahmed kwamba mali yake yote irithiwe na mume wake inabaki kama ilivyokuwa, kwa maana hiyo watoto wa marehemu huyo nao hawatapata haki yao ya kurithi kwa mujibu wa sheria za Kiislamu.

Katika kesi hii aliyekuwa mume wa marehemu Rukia Ahmed alidai kwamba mke wake alimuachia wasia wa kurithi mali yake yote.

Watoto wa marehemu walipinga kutambuliwa kwa wasia huo kwani ni kinyume cha sheria za Kiislamu.

YALIYOMO

TAHARIRI
HAKI YA KUABUDU MASHULENI: Hoja ya uwingi isizuie haki ya wachache

Aliyeandika Yesu si Mungu bado akabiliwa na kesi
Na Mwandishi Wetu

Wazazi walia na Mkuu wa shule Mkwawa
Na Mwandishi Wetu, Iringa

Serikali iache kudhulumu Waislamu - Bakwata
Na Mwandishi Wetu,

KESI YA MIRATHI: Hukumu ya Jaji Agostino yatupwa
Na Mwandishi Wetu

Sumaye sasa atoa ‘waadhi’ Msikitini
Na Mwandishi Wetu, Arusha

Sekondari ya Kiislamu Sumbawanga, mtihani kwenu – Sheikh Akilimali
Na Harun Rashid, Sumbawanga

37 wasilimu Mwanza
Na Mwandishi Wetu, Mwanza

Akamatwa kwa kusoma gazeti la ANNUUR !

MGOGORO WA CHWAKA NA MARUMBI: Serikali ya Dk. Salmin itafute ufumbuzi
Na Mwandishi Wetu, Pemba