An-nuur Na. 175

AN-NUUR
Na.175 Rajab 1419, Novemba 13 - 19, 1998

Ubabe wa madhalimu kuzimwa: ‘Wamarekani walikiona cha moto Iran’
Na Mwandishi Wetu

IMAMU na Khatib wa Msikiti wa Ma’mur Sheikh Talib amesema kwamba ucha Mungu na kumtegemea Mwenyezi Mungu ni silaha na kinga kubwa kwa muumini.

Akifafanua nukta hii, Sheikh Talib alitoa mfano wa tukio la Mtume (s.a.w.) kutoka salama akielekea Madina wakati nyumba yake ilikuwa imezungukwa na wauaji.

Alisema Mtume (s.a.w.) alisoma Surat Yaasin huku akiwatupia mchanga wauaji hao na wakalala usingizi huku Mtume (s.a.w.) akiwapita hawana habari.

Sheikh Talib akihutubia siku ya Ijumaa iliyopita alisema kwamba tukio kama hilo limejirudia katika miaka ya hivi karibuni ambapo ndege za Wamarekani zilipongana wenyewe kwa wenyewe zikiwa angani zilipokuwa zinajaribu kuivamia Iran ili kuwaokoa Wamarekani waliokuwa wanashikiliwa mateka. Kama alivyofanya Mtume (s.a.w.) Sheikh Talib alisema kwamba Wairan walisoma Surat Yaasin na nguvu za Wamerakani zikayeyuka angani.

Kwa mifano hiyo Sheikh Talib alisisitiza kwamba mafanikio na ulinzi kwa waumini unatoka kwa Mwenyezi Mungu na kuwaonya wale wanaokimbilia kwenye mizimu.

Hata hivyo, Sheikh Talib aliwakumbusha waumini kwamba wasitarajie kupata mafanikio pekee katika mambo yao halikadhalika kupata ushindi tu kila wakati.

Alisema kwamba ni katika utaratibu wa Mwenyezi Mungu kuwajaribu waumini ili wapate kujulikana wale waumini wa kweli na wale waongo.

Katika kujaribiwa huko Sheikh Talib alisema kwamba matatizo mbalimbali yatawakuta waumini na watakaofuzu na kufanikiwa ni wale watakao subiri na kumtegemea Mwenyezi Mungu.

Awali katika khutba yake Sheikh Talib alieleza falsafa ya miraj na Israh ambayo ni katika matukio muhimu katika historia ya Uislamu.

Miraj ni safari ya Mtume (s.a.w.) kutoka Makka hadi Baitil Muqadas wakati Israh ni safari ya Mtume (s.a.w.) kutoka Baitil Muqadas hadi wingu wa saba na kurejea.