An-nuur Na. 181

AN-NUUR Na.181 Ramadhan 1419, Desemba 25 - 31, 1998

Saumu na lishe ya mama mjamzito

Na Mujahid Mwinyimvua

BADO tunaendelea na kutoa taaluma maalumu kwa wasomaji wetu walio Waislamu ambao wanaendelea na mfungo wa mwezi mtukufu wa Ramadhani. Kwa leo tunaeleza ibada ya saumu na lishe ya mama mja mzito.

Awali ya yote, watu wakumbuke kuwa Uislamu ni mfumo kamili wa maisha. Hivyo basi, ibada zote katika dini hii zinazingatia hali zote za mwanadamu.

Yaani hali ya kimwili na zile za kiroho. Kwa vile funga ya Ramadhani ni chuo maalumu kinachokusudiwa kuwandoa waumini, hali za waumini hao zimezingatiwa katika sheria ya utekelezaji wa ibada hiyo.

Kwa mfano, mtu kuwa na afya nzuri na utulivu ni masharti muhimu kwa Muislamu ili aweze kuitekeleza ibada ya saumu. Ni kwa msingi huo, sheria ya dini ya Kiislamu inawataka baadhi ya Waislamu kufunga na pia imewasamehe wengine kufunga pindi wanapokuwa katika hali isiyo kuwa ya afya njema, safari, umri mkubwa, hedhi, nifasi, ujauzito, kunyonyesha n.k.

Katika makundi hayo, kuna wanaostahili kufunga wakati wakiwa katika hali zao za kawaida na kuna wale waliosamehewa kabisa.

Makala hii si lengo lake kuyatazama makundi hayo kwa kina, kwa hiyo tunawaomba wasomaji wetu watazame rejea zinazohusika na somo hilo kwa kina.

Mama mjamzito anaruhusiwa na sheria ya dini ya Kiislamu kuahirisha funga ya Ramadhani. Yaani Ramadhani ikimkuta hali ya kuwa mjamzito na mwenyewe (au daktari) ana wasiwasi na afya yake au ya mtoto wake (kuwa wataathirika) ni ruhusa juu yake kula katika mwezi huo wa Ramadhani na atawajibika kuilipa funga hiyo wakati hali yake imerejea ya kawaida.

Kama tulivyosema awali, swala hili (la kulipa saumu) lina maelezo marefu, kwa hiyo watu wafanye rejea katika vyanzo vingine (siyo makala hii).

Kama tunavyojua, mtu akifunga pamoja na mambo mengine anajizuia kula na kunywa, takriban kwa masaa 15 au 16. Kitendo cha mwili wa mama mja mzito kukosa chakula kwa muda huo ni wazi kuwa kinaathiri kwa lishe na afya ya mama na mtoto wake aliyetumboni.

Kwa hiyo, kina mama wajawazito ni vyema kuipokea ruhusa ya sheria ya dini ya Kiislamu ya kuahirisha funga ya Ramadhani mpaka pale atakapokuwa katika hali ya salama (kawaida).

Tuliwahi kusema katika makala zilizopita za chakula na lishe kuwa: Wakati wa ujauzito ni muhimu mama ale vyakula vya kutosha, ahudhurie kliniki, apumzike hasa miezi mitatu ya mwisho ya ujauzito na lazima apate tiba na kinga ya maradhi.

Pia tulisema kuwa, mama mjamzito anahitaji kula vyakula vya kutosheleza mahitaji yake yeye mwenyewe na mtoto aliye tumboni. Kwa kawaida mama anatakiwa aongezeke kilo kumi na mbili kwa muda wote wa ujauzito wake.

Vile vile chakula chake kiwe mlo kamili (yaani cha mchanganyiko wa virutubisho vyote muhimu) Mama mjamzito asiyepata muda wa kupumzika na asiye kula vizuri anaweza kutokuongezeka uzito, kuwa na upungufu wa damu, kujifungua mtoto mwenye uzito pungufu (chini ya kilo 2 1/2), mimba inaweza kuharibika, anaweza kujifungua kabla ya wakati n.k.

Kwa kuzingatia maelezo ya hapo juu ni imani yetu kuwa hikma ya sheria ya dini ya Kiislamu ya kuwaruhusu kina mama wajawazito kuahirisha funga zao iko wazi.

Na pia watu wasidhani kuwa kujilazimisha kufunga hali ya kuwa wana mimba ni ucha Mungu, Hapana, bali huko ni sawa na kujiua jambo ambalo Mwenyezi Mungu ametukataza:

"...Wala msijiue, hakika Mwenyezi Mungu ni mwenye kukuhurumieni". (4:29)