Mheshimiwa Kitwana Kondo (MB) ametoa ufafanuzi kwamba anachofanya sio
kutafuta umaarufu bali
kutekeleza wajibu wake na haki yake ya kuishauri Serikali na Chama
chake CCM, iache kutojali mambo
yanayowahusu Waislamu.
Akizungumza na waandishi wa habari nyumbani kwake Mei 27; Mh. Kondo
alisema kwamba kutokujali kwa
Serikali katika masuala ya Waislamu kunatoa tafsiri kwamba bila shaka
Serikali haiwapendi Waislamu.
Akitoa mfano alisema kwamba watu walio ndani wengi ni wagonjwa, wengine
wazee na wameshakaa ndani
kwa zaidi ya miezi mitatu na mmoja kesha kufa. Katika mazingira hayo
alisema kwamba dhana ipo kwamba
Serikali inafurahia hivyo; kwamba wafe mmoja mmoja!!
Kuhusu kile kinachoitwa kwamba ni kashfa dhidi ya dini nyingine Mhe.
Kitwana Kondo alikariri kauli yake ya
Mei 21; kwamba Serikali isiyo na dini inafanya kosa kuwashitaki watu
kwa sababu ya imani yao. Alisema
kuwashitaki watu kwa kusema maneno yaliyoko ndani ya Qur’an ni sawa
na kusema kwamba Qur’an ni kitabu
cha uchochezi ambacho inabidi chenyewe na Uislamu wenyewe upigwe marufuku.
Mhe. Kondo alishangaa na kuhoji Serikali inaposema kashfa kwa dini nyingine.
"Dini gani?’ Wakati Maaskofu
wenyewe wanasema Muislamu kusema Yesu si Mungi si kosa wala si kashfa!
Akithibitisha kwamba wanayosema Waislamu yapo ndani ya Qur'an yao, Mheshimiwa
Kitwana Kondo akiwa
na Msahafu wa tafsiri ya Qur'an alizinukuu aya zifuatazo:
Kwa yakini wamekwisha kufuru waliosema: "Mwenyezi Mungu ni Masihi bin
Maryamu. (5:17). Bila shaka
wamekufuru wale waliosema; Mwenyezi Mungu ni Masihi (Isa) bin Maryamu.
(5:72).
Kwa hakika wamekufuru wale waliosema: "Mwenyezi Mungu ni mmoja katika (wale waungu) watatu. (5:73)
Masihi bin Maryamu si chochote ila ni Mtume (tu). (Na) bila shaka Mitume wengi wamepita kabla yake. (5:75)
Na kwa (ajili ya) kusema kwao: "Sisi tumemuua Masihi Isa mwana wa Maryamu
Mtume wa Mungu", hali
hawakumwua wala hawakumsulubu... (4:157).
Kuhusu suala la dhamana Mhe. Kondo alisisitiza kwamba ni Serikali inayozuia
dhamana na wala sio
Mahakama. Alisema kwamba ni Serikali iliyoshitaki na ndiyo inayotoa
hoja Mahakamani kuzuia dhamana.
Kwahiyo ameitaka Serikali iache kubabaisha kwa kusema kesi ipo mahakamani.
Aidha Mhe. Kitwana Kondo amerejea kauli yake kwamba Serikali ilifanya
makosa kwa Polisi wake kuvamia
na kuvunja msikiti. Lakini pia akasema kwamba Serikali ilichangia vurugu
za Mwembechai kwa kitendo chake
cha kumkamata Bw. Magezi msikitini kukiwa kumejaa watu
Maelezo haya ya Mhe. Kondo ameyatoa kufuatia maelezo yaliyotolewa na
Serikali na baadhi ya taasisi juu ya
yale aliyozungumza na waandishi wa habari Mei 21.